Mədinə Gülgün (Ələkbərzadə Mədinə Nurulla qızı)

Ürəyin tələbatı.

Mədinə xanım Gülgünə.

Şeirlərinizdəki poeziyadan aldığım təəssürata görə bu çiçək dəstəsini bir oxucu kimi, şeirdən qidalanan bir oxucu kimi, içərisi odlu-alovlu bir oxucu kimi, dərin temperamentli arzuları dil açıb-danışan bir oxucu kimi, sənətkarın qədrini bilib, onlara tez məftun olan bir oxucu kimi, sinəsində cənub ailəsindən miskin xatirələr qalmış bir oxucu kimi Sizə təqdim edirəm!

Ümumiyyətlə, mənim sənətkarlara etdiyim müraciət məktubdan çox «Novellaya» bənzəyr. Xahiş edirəm, bu Sizə qəribə görünməsin. Mən ən çox o sənətkarların daxili aləminə vurğunam ki, o, Xəlil Rza kimi (nervpatoloq) olsun! İstəyirəm o (nervpatoloqlar) mənim sözlərimə ürək, beyin, qan damarları versinlər. Mənə sənətkarların sənətinə dar düşüncə ilə baxa bilmirəm. Xöşbəxt o şəxsdir ki, hər şeyə soyuqqanlılıqla yanaşır, dərdi özündən kənara qovmağı bacarır. Mən bütün fəlsəfi sözlərlə gəlib dənizin sahilində dayanmaq istəyirəm! Ancaq o hansı dənizdir!... O qartaldan dəm vuran qadın sinəsindəki dənizdir!!! Bəli, doğru deyirsiniz, hörmətli şairə, dənizin sahili var, ancaq sizin poeziyanızın ucu-bucağı tükənməzdir. İstəyirəm o dənizin suyundan nurlansın beynim-başım!

Doğrusu, son kitabınız mənə həm pis, həm yaxşı təsir etdi.Yaxşı təsiri budur Ki, insanlardan gizlədərək, zindana salıb, ağzını qıfılladığım bir anketin səhifələrini bu kitabda gördükcə vahimələndim, yerimdə donub qaldım! Axı bu anketin açarı məndədir! Bu açarı Sizə kim verib?! Onu mənə tanıtdırın.

İstəyirsiniz deyim o kimdir:

Ona zaman deyərlər, ona çox nifrətim var!..
Soruşur kamanə çox həvəsin var?
Deyirəm onsuz da zilim qalmayıb…
Deyir bəs həyatda hər bir neməti,
Ürəklə birlikdə dərk edir insan?..
Deyirəm baxçamın gülləri solub,
Həyatda hər şeyə məruz qalmışam.
Deyir bəs xöşbəxtlik bəxş etsəm necə?
Deyirəm qəlbimi almazsan ələ.
Deyir ki, kainat gec gedir, - Şahin!...
Gəlib bu karvana sarvan olsana!..
Deyirəm qəlbimdə üşütmələr var,
Mən çoxdan cənuba hazırlaşmışam!!!

İkinci təsiri budur ki, bundan aldığım təəssürat məni qəhərləndirdi. Anamın keçirdiyi faciəli həyat yadıma düşdü. Körpəsinə lay-lay çalmaq istəyəndə hörükləri tikanlı məftillərə dolaşa-dolaşa uca dağlar zirvəsindən səsi gələn anamın. Hər şirin kəlmənin sərlövhəsi anamın. Mən elə buna görə də «Dənizin sahili var» kitabınızı oxuduqdan sonra sizə məktub yazmaq qərarına gəldim. Siz kədərli şairəsiniz! Sizi görüm bundan sonrakı yaradıcılıq yolunuz kədərsiz olsun…Gün o gün olsun ki, Təbrizdə yazıb yaradasınız!...

Şahin Küsgün